就快踏入畢業季節，又臨近搵工旺季，唔知準畢業生預備好份CV未呢？其實見工前除咗搞掂份CV、要預備好到時點應對，同埋著得好好睇睇準時出現之外，其實仲有好多野要留意。



《Business Insider》報道，有外國網友綜合咗多個見工時應徵者有機會誤中嘅地雷，大家不妨望一望，減少面試被叮走嘅機會。

第一，見工時要避免出現dead air，雖然面試官唔介意應徵者需要靜低幾秒，思考佢地問嘅問題先俾答案，不過如果應徵者諗勁耐先答，面試官就可能唔多鍾意。另外，如果見工時面試官好似冇乜野想問你，你都可以反問返對方一啲關於份工嘅問題，點都好過靜咗唔出聲。



第二，唔好企圖用同情心打動面試官去請你，因為可能會有反效果。舉例講，應徵者可能搵咗好耐工都搵唔到，有好沉重嘅經濟壓力，但無論有幾需要呢份工，都唔可以喺見工時講出嚟，因為對方隨時會因為咁而覺得應徵者係一個私人問題多多嘅人，反而對應徵者扣分。



第三，全無工作經驗，尤其是較大年紀先畢業嘅應徵者，未必太受面試官歡迎。所以讀書時做嘅兼職或暑期工，就算同你而家應徵嗰份工無關，都應該寫埋落CV度，俾人知你唔係零社會經驗，就算CV冇寫見工時都要提及吓。



第四，唔應該提及宗教上嘅野，除非你應徵嘅工係同宗教有關。原因好簡單，每個人可能有唔同嘅宗教信仰，如果因為自己同面試官信仰有別，而被對方扣咗印象分，咁就相當無謂。



- http://hk.apple.nextmedia.com/realtime/finance/20160404/54946143