10個有10個打工仔都無得揀上司，頂多揀過份工。而史上最令打工仔無奈嘅上司，要數以下5大類型。唔知你有無一個喺左近呢？



1/ 無膊頭兼無厘頭

無膊頭嘅人做上司已經係大忌，但低處未算低，如果無膊頭混合無厘頭，絕對有資格成為極品。網上曾經有個都市傳說，話有打工仔發電郵向上司問嘢，等咗成個星期先收到上司「神」回覆：「我嘔緊，Thanks for the email，遲啲覆」。畀著你收到咁嘅回覆，唔係唔擺上網呀嘛？



2/ 冷血殺手

家有急事或屋企人急病，必須攞假，但上司唔批，理由係無「預先申請」！話到明急，點樣「預先」？



呢類上司永遠懷疑下屬請假偷懶，毫無同理心，完全唔理人哋屋企死活。返工賺份糧，都係為養家，得到咁嘅待遇，下屬仲點會全心全意幫公司做嘢？



3/ 擺款挑剔怪

「其實你都唔係做錯咩嘢，但我又睇唔到有乜理由要加你人工，總之有好多嘢要改善！」做上司有要求好應該，但年年Appraisal都講呢啲，又講唔出具體有咩要改。到底係奄尖挑剔定擺款呢？或者其實係刻薄想剝削人囉。



4/ 團隊妄想狂

做得管理層當然要建立團隊文化，但矯枉過正就變「怪獸上司」。例如逼全體下屬提早返工一齊食早餐、放工一齊做運動，甚至逼人工餘參加啟發潛能課程。完全唔尊重人地私人時間同空間。



5/ 公司害蟲

有啲上司正經事唔做，但就扭盡六壬搵公司著數。最恐怖係逼埋下屬同流合污，用公司資源幫佢地做私人嘢。下屬唔就範，佢地就借啲意「炒魷」封人口。呢啲簡直係公司害蟲，宜諸殺。



- https://www.ctgoodjobs.hk/news/5大乞人憎腦細/854084577