從前酒店、飲食及零售等行業鬧人手荒，為解決人手問題，過去靠俗稱「蛇頭」的中介人，轉介有經驗的從業員炒散當臨時工。網絡年代，近年出現網上蛇頭，設Facebook專頁提供炒散資訊，吸引一批年輕人入行炒散，有學生稱「返工時間夠彈性，遷就我返學」。



有大學生因日間返學，放學後兼職散工，經網上蛇頭介紹在酒店炒散；他說，以前在酒樓炒散經傳統蛇頭安排，但時間地點欠彈性，經常告吹，近年在網上中介公司提供食肆兼職資訊，透明度好高，講明幾錢，邊度返工。而且有較高主動權，「我想邊日返工，係咩地區返工，我 WhatsApp 畀網上蛇頭，對方即刻覆得唔得，唔使等，一部手機搞掂。而家成班學生都搵網上蛇頭做蛇仔（臨時工）」。



不少學生放後到酒店食肆抄散



酒樓負責人大讚呢班年輕人有禮貌時又肯做



有酒樓負責人大讚呢班年輕人有禮貌時又肯做，他表示實施最低工資後，聘請員工越趨困難，樓面、清碗等長期缺人，經勞工處招聘一直沒回音，透過傳統蛇頭找兼職，「搵5個得兩個，唔夠人我自己做埋洗碗、吸塵」。他開始嘗試經網上蛇頭請散工，「好驚喜，要幾多個有幾多個，仲隨傳隨到」。蛇仔有不少是90後大專生，「佢哋有禮貌，識得同啲客拉凳」。經一個月試用，酒樓決定棄用傳統蛇頭，改為網上蛇頭，「手續費仲平咗」。



Facebook 散工專頁負責人則表示，推出近大半年已有70多間中西日食肆參加，包括高級食府及酒店等，職位方面有樓面、廚房、洗碗等；登記兼職人數逾千人，不乏大專生找兼職，也有白領搵外快。他說年輕人習慣上網，故推出網上中介平台，方便勞資雙方，因容易配對工作，反應不俗，「我哋會按求職者資歷、居住地等配對；或者已做開某間食肆就會優先考慮，食肆就唔使再教多次；求職者又可主動WhatsApp邊段時間炒散，我哋幫佢配對。宜家90後唔想做長工，彈性工啱佢哋，使晒錢又做過」。



- http://www.hkgoodjobs.com/career_focus.php?p=1508&cat_id=10